Sera konosí ku Jandely Caridad Ricardo shòrt stòp estelar di St. Rosa Angels.

Jandely tin 17 aña i ta den klas 5 di Havo na Albert Schweitzer. E ta midi 1.64 i ta bati i filia ku man drechi. E ta konosí pa su spit, fildeo i bateo. E ta MVP i kampeon bate di Hubenil temporada 2015. Den AA e la dal un homerun ku a lanta hopi stof. Pa Jandely esei tabata su promé homerun bula waya. E ta aspirá pa bira un akountent.

Ku 6 aña e la hunga T-bal. Ku 7 aña e haña invitashon pa bin hunga softball den St. Rosa Angels. Ekipo den kua e ta militá te asta dia di awe. E ta shòrt stòp regular di tantu St. Rosa komo selekshon. Tambe e ta picha i hunga tersera base. Ku 11 aña e la haña su promé invitashon pa ta den selekshon di Kòrsou. Na 3 okashon e la sali sup kampeon di Latino Amérika. Tambe e la militá den e selekshon di hóbennan ku a gana e ekipo Merikano aki na Kòrsou. Aparte di sòftbòl e la hunga futbòl tambe pa korto tempu i a representá Kòrsou den selekshon di futbòl na Guyana na 2011.

Su fortalesa ta su fildeo i bateo. E ta hasi kontakto regular ku e bala. E tin un bon alkanse i un bon brasa. E tin un personalidat kompetitivo. E por rabia ku su mes. E triki ta pa shake e kos ei off i keda enfoká riba wega. “Pichingolo ta un ekipo ku ta ferfelu”.“Nos ta trata pa konosé nan i antisipá nan bataso”. “Bo mester posishoná bo mes bon riba fèlt”. E picher ku ta dun’é mas difikultat na bate ta Arnalda Margaritha. E tin un tremendo spit. “Bo mester saka man lihé riba dje, si no e ta ganabo”.

Softball ta un etapa dushi di su bida. Softball a dun’é disiplina i stimulá su kreatividat. Tambe e la sera hopi amistat lokal i internashonal. E sa reforsá ekipo den torneo rekreativo. Hendenan ta atmirá bo “skills” i nan ta elogiá bo p’esei. Tambe e ta hunga den softball eskolar. E ta pidi coach Ralph Pereira pa e aña aki si laga e muchanan pich’é. Jandely ta smile so.

Jandely su dosente preferí ta yùfrou Martina di Ekonomia. “E ta komprondé nos”. E ta splika bon i ta duna indikashon ki bo mester sa. E no ta menospresiá su alumno. Tambe e tin apresio pa coach Djuni i Dianne Rosa. Ámbos di St. Rosa. “Mi ta haña hunga bou di coach Djuni hopi bon. E ta bin pa gana. E sa hopi di strategia i regla di softball. E por preshoná bo tambe. E hasié paso e sa kiko e tin den su hungadónan i sa ken por hasi kiko òf no. Un bon coach! Daine Rosa ta mi kompañera di team. E ta un hungadó ku na momentu ku nos ta pèrdí i ku e tin ku bin relevá ta mantené kalmu i trese trankilidat. Mayoria biaha si nos ta atras, ku Dianne ei riba, nos ta bai ku e viktoria. E ta inspirábo i mi tin hopi konfiansa den dje “.

Na final Jandely ta pidi públiko pa bin wak e weganan di AA. Bon wega pero e ta sinti falta di mas públiko.

Relato: Anthony Guillermo