Sera konosí ku Ailnairis Belefanti

Ailnairis Belefanti tin 19 aña. E tin su diploma di VSBO i ta alumno segundo grado di Instituto di Formashon den Enfermeria (IFE). E E ta filia i bati na man drechi. E ta start up center fielder di Young Stars. E ta kompensá su estatura 1.46 m ku un spit ku ta dun’é un bon alkanse tantu riba su man drechi komo su man robes. Esei ta hasi di dje un center fielder ku por “run down” kualke bataso. E mesun spit ei ta hasié peligroso riba base. Si nan deskuidá e ta kore riba nan. Ta dos kalidat ku ta dun’é un posishon komo start up centerfielder den su ekipo.

E tin 6 aña ta hunga softball i ta pensa ku mester hasi mas pa mas hóben interesá pa hunga softball kompetitivo. “Mi a kuminsá hunga softball ku 13 aña den ekipo di Kanga. Coach Magda a mira mi kapasidat i talento i a duna mi kurashi pa mi purba den ekipo ku por dunami mas oportunidat pa krese den e wega. Mi a militá asina den Vipers i despues St. Rosa. Pero kas a keda trèk i mi a bin bek Kanga i afiliá mi mes na Young Stars. Nos ta un ekipo hóben ku muchanan ku por bira hopi bon. Nos ta trahando riba esei. Mi ta mira resultado di e training i trabou duru”.

“Komo hungadó mi ta un hende basta trankil. Mi no ta ansha lihé. Mi estatura ta buta ku pichernan tin problema tin biaha pa pichami. Mi sa esei i ta probechá di e faktor. Mi ta haña hopi base por bola. Si nan bin ei den, mi por dal tambe. Mi ta hasi bon kontakto. Atrobe einan mi pasenshi ta yudami”.

“Mi ta un pasifikadó. Den nos komunidat in hopi hende ku ta rabia muchu lihé. Nos mester hasi algu ku e kos ei. Ku poko ma pasenshi kosnan ta kana mas mihó”. “Aina” ta splika ku e ta un hende sosial ku kurason grandi pe hende den nesesidat. E kurason ei a inspir’é p’e sigui un karera den kual e ta traha ku hende. Asina e la opta pa bai IFE. Algun desaroyo riba plano personal ta buta ku awor aki e ta pensando den ki direkshon e ke hiba su estudio. “Bo sa, mi ta un eksplorando mi posibilidat nan. Talbes destino hibami eksterior”. Aina ta sonreí ora e bisa esei.

Komo studiante den área di salubridat e ta duna deporte hopi balor. E ta di opinion ku aparte ku e ta mantenébo salu e ta preparábo tambe pa trabou den área di maneho. “Den deporte bo ta hañabo ku un kantidat di karakter i ora bo ta miembro di tim bo ta siña dil ku e diversidat ei. Prinsipalmente e ta siñabo traha huntu. Mester hasi mas esfuerso pa mas mucha muhé hasi deporte. Lo mi ke mira mas tim di softball, mas kompetensha. Ami ke yega leu ku mi softball. Mi ke sigui mehorá i sigui krese. Mi tin aspirashon haltu i mi ta buska pa krea oportunidat pa mi logra mi soño”.

Na final “Aina” ta elogiá e esfuerso di e boluntario ku ta riba fèlt i esun ku ta pafó di fèlt. E ta elogiá prinsipalmente esnan ku ta pusha pa fanátiko sa ta ken ta e damsita nan ku ta hunga softball. “Ladies at night, tough in their game”.

Relato: Anthony Guillermo