Preparashonnan ta kontinuá pa nos selekshon femenino su partisipashon na e Concacaf women road to World Cup 2023!

NOS HUNGADÓNAN TA KONOSÍ!

Nos ta drentando e siman di e CONCACAF Women Road to World Cup 2023 kaminda nos selekshon lo sali mañan mèrdia 1’or rumbo pa Cayman Islands pa nos promé partido, dia 26 di òktober kontra Cayman Islands. Despues nos selekshon lo regresá Kòrsou pa enfrentá Anguilla na kas dia 30 di òktober binidero. Tiki tiki pero sigur e ora 0 ta yegando kaminda nos selekshon nashonal senior lo ta den akshon representando Kòrsou durante e kampionato aki.

Nos selekshon ya tin algun luna ta praktiká i preparando pa saka kara di Kòrsou. Un grupo di 22 hungadó ta forma parti di nos selekshon nashonal femenino senior. E hungadónan aki ta hungadónan áktivo di nos Kampionato Femenino pero tambe tin 6 hungadó residensiá den eksterior ku a bin pa reforsá nos selekshon.

4 di nos 6 refuersonan a pisa suela di Kòrsou pa kontinuá ku e preparashonnan pa nos partido di djaweps na Cayman Islands. Ta trata aki di Sadéyah Rosa ku ta militá den FC Skillz, Kyara Bernadina ku tambe ta den FC Skillz, Naychelene Nisia hungadó di Excelsior i Diangely’s Strijdhaftig ku tambe ta forma parti di FC Skillz. 4 damita ku sigur lo duna un man pa fortalesé nos selekshon durante e partidonan aki. Ayera nos selekshon a train pa promé biaha huntu ku nos refuersonan ku tei, pa ta kla prepará pa nos kompromisonan den e CONCACAF Women Road to World Cup 2023. Awe nos otro refuerso ta yega Kòrsou miéntras e último lo biaha direktamente pa Cayman Islands. 

Nos selekshon ta wòrdu dirigí pa sr. Dean Gorré ku ta wòrdu asistí pa sr. Heinrich Roojer i sr. Marcello Pisas komo entrenadó di portero. Sra. Denice Linger Berggraaf huntu ku sra. Marina de Miranda ta e masahistanan miéntras dòkter Eartha Helstone tambe ta kompañá nos selekshon. 

Sra. Jadira Laaf ta enkargá ku e materialanan di nos selekshon, e ‘team manager’ di nos selekshon ta sra. Christine Davelaar i e hefe di delegashon ta sra. Sharetti Bryan, miembro di direktiva di FFK.

E siguiente hungadónan ta forma parti di nos selekshon;

1. Sterre Noordhoek (Inter Willemstad)

2. Ignarda Pieternella (Hubentut Fortuna)

3. Riesmarly Tokaay (Hubentut Fortuna)

4. Fellicity Verhagen (Fc Binnenmaas, Hulanda)

5. Taïsha Hansen (Inter Willemstad)

6. Jeleaugh Rosa (MSV Duisburg, Alemania)

7. Kadisha Martina (Inter Willemstad)

8. Ashanty Alexandré (Excellence School)

9. Anaïse Piar (Hubentut Fortuna)

10. Rushaviana Petronilia (Jong Colombia)

11. Sadéyah Rosa (FC Skillz, Hulanda)

12. Thiheyna Susana (Undeba)

13. Kyara Bernadina (FC Skillz, Hulanda)

14. Naychelene Nisia (Excelsior, Hulanda)

15. Diangely’s Strijdhaftig (FC Skillz, Hulanda)

16. Soerianieh Nucatia (Excellence School)

17. Julainy Fanijten Thielman (Excellence School)

18. Kimberly Olaria (Excellence School)

19. Emily Pulido Baloa (Excellence School)

20. Queen-Jelly Alexandre (Excellence School)

21. Lauryn Richardson (Inter Willemstad)

22. Gervionna Martina (Jong Colombia)

Preparashonnan ta kontinuá pa nos selekshon nashonal femenino senior su partisipashon na e CONCACAF Women Road to World Cup 2023 ku lo tuma lugá dia 26 i 30 di òktober 2023 na Cayman Islands i aki na Kòrsou!