NOS SELEKSHON NASHONAL FEMENINO SENIOR TA PROMOVÉ PA LIGA B DURANTE E ROAD TO GOLD CUP 2023!

Nos selekshon nashonal femenino senior a sali viktorioso un biaha mas i a gana Anguilla ku skor di 5-1 durante nos terser enkuentro di e CONCACAF Women Road to Gold Cup 2023!

4 di nos golnan a keda anotá pa Kadisha Martina miéntras Taïsha Hansen tambe a anotá un gol p’asina logra otro viktoria pa nos selekshon.

Despues di 3 viktoria durante nos 3 enkuentronan di liga C di e CONCACAF Woman Road to Gold Cup 2023, nos selekshon nashonal femenino a promové pa liga B! Algu sumamente grandi pa nos selekshon ku a bin ta traha duru pa saka Kòrsou su kara durante e kampionato aki. Mañan atardi nos selekshon lo ta bèk na kas pa sigui ku e preparashonnan pa nos di 4 i último partido den Liga C kontra Cayman Islands.

E partido aki lo tuma lugá djaluna awor, 4 di dezèmber pa 8’or di anochi den Stadion Rignaal ‘Jean’ Francisca. Karchinan ya ta optenibel ‘online’ riba www.tibbaa.com na balor di fl.10 pa adulto miéntras mucha di 6 te ku 12 aña i 60+ ta paga solamente fl. 5,-.

Mañan atardi 4’or nos selekshon ta yega Kòrsou i ta invitá pueblo di Kòrsou kompletu pa bin risibí nos selekshon na aeropuerto komo muestra di orguyo, pa nos damanan ku a hasi un tremendo trabou durante e kampionato aki i a promové pa liga B!

Awor nos selekshon lo sigui prepará pa nos di 4 partido di djaluna binidero kontra Cayman Islands kaminda nos lo seya nos promoshon pa liga B i selebrá ku nos fanátikonan na kas!

Pueblo di Kòrsou kompletu ta keda invitá bin apoyá nos damanan na kas durante nos delaster partido di Liga C kontra Cayman Islands i risibí nos selekshon mañan atardi 4’or na aeropuerto!

Pabien un biaha mas Kòrsouuuu…bo por ta orguyoso di bo yunan!

Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x