Neiska Franklin ta picha fuerte pa Sta. Rosa Angels gana Demolition Cartel den sòftbòl AA

E hóben Neiska Franklin di Sta. Rosa Angels Vanddis a picha ku komodidat riba un Demolition Cartel ku su ofensiva no por a keda kla ku su lansamentunan. E wega bálido pa kampeonato AA 2018 a tuma lugá na Sabana ball park. Un bon públiko a mira kon e hóben Neiska a haña bon respaldo serka su defensa. Su ofensiva a buta sufisiente koredó den sirkulashon i trese sufisiente kas pa akumulá 9 kareda. Ku e diferensia di mas ku 7 kareda den bòm di 5, e chif umpire Johnny Augusta ta dekretá e nòk out. Ku esei Sta. Rosa Vanddis a gana e wega ku skore di 11-2.

Demolition Cartel a asigná Naiska Fransisca pa habri e wega. e la forma bateria ku su ruman Leste Fransisca. Neiska no por a keda kla ku e ofensiva di Sta. Rosa. Sta. Rosa a konosé un inning grandi den di dos entrada. Pifianan den defensa di Demolition a bin buta ku sta. Rosa a akumulá 8 kareda den e di dos inning. Leste Fransisca a drenta di relevo. Aunke e la picha akseptabel, e falta di produktividat di e ofensiva a bin kòrtá garganta di e Demolition. Den habrida di 4 Demolition ta monta un menasa i nota 2 kareda pa kòrtá bentaha. Neiska ta rekuperá seriedat i picha strak pa sali for di e inning. Sta. Rosa ta buta 2 kareda mas aserka den bòm di kuater inning. Demolition ta faya di bira peligroso den habrida di 5 inning o nota pa kibra e nòk out. Ku e wega legal i e diferensha di kareda, e chif ta dekretá e nok out den bòm di 5 inning.

Neiska ku a bai e ruta kompletu ta gana su promé wega.

Arnalda Margaritha ta picha dominante pa Pichingolo pasa sin kompashon riba Nos Tei Office Supply, 13-0.

Arnalda Margaritha tabata simplemente dominante den un wega ku a hunga kompletamente riba e man di Pichingolo Kia Nissan. Práktikamente henter e ofensiva di Nos Tei a haña un ponche. E picher eksperensia a picha ku gran komodidat ora ku su ofensiva for di trempan a dun’é un bentaha pa por traha ku n’e.

Nos Tei a postulá Naiska Fecunda pa habri e wega. E hóben no a mustra e mesun velosidat ku Arnalda, pero tampoko e la picha malu. Su lansamentunan poko off spit tabata saka e ofensiva di Pichingolo un poko for di balanse. Sinembargo mayoria di e batidónan a sa di ahustá i mishi bon ku e bala. Lant’é of mand’é di liña pa outfield. Kisas ku un poko mas agresividat di e outfielder, algun di e bala nan por a ser kaptura i e daño por tabata ménos. Fecunda a poncha algun di e ofensiva di Pichingolo.
E agresividat di Pichingolo riba base, kombiná ku kisas un poko mala suerte den e defensa di Nos Tei, a habri kaminda pa Pichingolo rápidamente akumulá kareda riba nan.

Pichingolo ta pika dilanti 2-0 den habrida di dos inning. Pichingolo ta akumulá 6 kareda den habrida di tres inning pa hasi e wega 8-0. Den habrida di 4 inning kos ta bai realmente for di man ora ku Pichingolo krusa plato na 5 okashon. Ku e wega 13-0 na fabor di Pichingolo den bòm di 4 inning, e situashon di black out ta subi mesa. Nos Tei no ta logra na bria peligroso i nota kareda den bòm di 4 inning. Ku e diferensia di mas di 10 kareda, chif umpire ta dekretá e black out i Pichingolo tab gana e wega ku skore di 13-0.

Reportahe: Anthony Guillermo