Lab de Med te felisita Churandy Martina i amigunan ku inisiativa di Speed Camp

Willemstad- Laboratorio de Medicos (Lab de Med) ku orguyo ta mira bèk riba e speed camp ku Churandy i amigunan a organisá pa komparti nan konosementu ku e hóbennan di Kòrsou.  Mas di 82 hóben djaweps 28 di desèmber último a reuni riba pista di Stadion Ergilio Hato pa siña di nos estreanan ku ta hasi ekstrago riba nivel mundial.  Churandy Martina, Liemarvin Bonevacia, Hensley Paulina i Terrence Agard a kompiná pa trese un tremendo klinika pa nos muchanan. Lab de Med ta kere den nos talentonan i ta konsiderá deporte komo un medio ekselente pa krea hóbennan salu ku den futuro ta krese bira streanan den na propio forma.

Ekselensha i profeshonalismo, banda di bon servisio, ta importante pa Lab de Med.  Inisiativanan manera speed camp banda di ta duna e mucha e oportunidat pa na un forma alegre pero praktiko atkerí konosementu i habilidat, tambe di topa ku nan idolonan personal.  E último aki ta di hopi balor pa e hóben, ya ku e ta krese ku un ambishon haltu i e gana di perservera pa e tambe bira manera e idolonan ku ela konose personal.  Di otro parti mester elogia e forma ehemplar ku Churandy i su amigunan, na un forma habri, a dedika tempu i energia pa hasi e speed camp un éksito rotundo.

“Ta ku plaser nos a partisipá i kontribuí na e speed camp organisá pa Curaçao Athletic Development Foundation i Churandy i amigunan.  Nos ta kontentu di por aporta na desaroyo di nos hóbennan.  Lab de Med ta kompromete ku e inisiativa aki i ta konvensi ku esaki lo bira algu fiho riba kalendario ku aun mas hoben probechando di siña di nos mihónan riba pista den mundu“ Rudy Le Blanc gerente di Lab de Med a bisa.