Firebirds ta bai p’un racha nobo den 2018

WILLEMSTAD. –

Firebirds e ekipo ku hopi hende tabata papia di dje for di den kabamentu di aña pasá a tene nan promé rueda di prensa ofisial djawebs anochi na Brakkeput Mei Mei ku e meta pa presentá e ekipo, e patrosinadornan ofisial i tambe revelá nan ünifòrm nobo.

Tabata un anochi ameno den presensia di medionan di komunikashon, spònsernan, dirigentenan administrativo i tambe coach i hungadónan di Firebirds. Sr. Bradley Stuart, Presidente aktual di Firebirds a habri e anochi yamando tur presente bonochi i a gradesí tur pèrsona ku a hasi akto di presensia. Sr. Stuart a enfatisá riba e importansia di e rueda di prensa aki pa motibu ku ta esaki ta e promé rueda di prensa ofisial di e ekipo i ku esaki lo sirbí pa introdusí e ekipo i su spònsernan ofisialmente na e mundu di beisbòl na Kòrsou.

Organisashon di Baseball Montaña Direktiva di Organisashon di Baseball Montaña (OBM) enkabesá pa señor Robert Martis ta un di e pionero nan di mas grandi segun Sr. Stuart. Sr. Stuart a gradisí direktiva di OBM pa e konfiansa ku nan a hinka den e komishon i ku awe Firebirds ta realidat. Kampionato 2018 “Despues di hopi preparashon durante lunan tras di lomba nos ta bai p’un racha nobo”, segun palabranan di Sr. Stuart. Esaki a bira e lema di Firebirds pa 2018 mirando ku a hasi varios kambio den e ekipo ku e meta pa hasi esaki muchu mas kompetitivo riba tereno i asina kuminsá un kultura ganadó den e organisashon.

Tambe a hiba palabra Sr. Hensley Josephina, Manager di e ekipo di Firebirds AA. Sr Josephina a splika ku e ta Manager di e ekipo ku e ta karga tur responsabilidat komo Manager, pero e ta konta ku ful sosten di su coachnan: Sr. Norval “Payo” Faneyte, Hunphrey Granger i Franco Wawoe. Mas aleu Sr. Josephina a bisa ku mirando e hungadónan ku ya e ekipo tabata tin i esnan ku a wòrdu atkerí e aña aki, e ekipo di Firebirds lo bai demostrá klase riba tereno.

Entre e hungadónan ku a wòrdu atkerí ta e poderoso Lorvin Louisa – eks-hungadó di Sta Maria Pirates, Quensy Lambertina i Laishenel Lacruz ku a bini for di Royal Scorpions, Ludwin Obispu ku a bini for di e ekipo di Wild Cats, Churandy La Cruz i Terrence Josephina ku ta eks-profeshonal, Hendrick Kinburn ku a bini for di Sta Rosa i e artista Jaidorick Woods ku a bini bèk den beisbòl despues di algun aña

Spònser Firebirds e aña aki ta konta ku un kantidat di kuater spònser, entrenan Citizens Insurance komo spònser prinsipal i ACU komo cospònser den Liga Hubenil. Tambe Firebirds ta konta ku Curoil, Cursoft i Brakkeput Mei Mei. Sr. Stuart ta di opinion ku e echo ku nan a atkerí e spònsernan aki no solamente ta bon pa e ekipo di Firebirds, pero e ta bon pa e beisbòl lokal tambe pa motibu ku esaki lo motivá i duna otro instansianan e konfiansa pa tambe yuda.

Representantenan di Citizens Insurance i ACU tabata presente i ambos a hiba palabra. Señora Jacqueline Bernabela di Citizens a bisa ku ta importante pa kompanianan lokal kere i sostené deporte lokal. Ku esaki den mente, Citizens a aportá na e ekipo di Firebirds pa aña 2018. Mas aleu Sra. Bernabela ta probechá di e momentu i ta invitá tur pèrsona pa pasa na Citizens paso nan tin e miho prima i e mihó servisio.

Señor Angelo Davelaar, Presidente di ACU tambe a hiba palabra. Den su diskurso e ta bisa ku tabata fasil pa ACU koperá ku e ekipo di Firebirds mirando ku nan tambe ta bayendo pa un racha nobo komo kompania. Tambe e ta di opinion ku ta den tipo di kosnan asinaki mester invertí paso deporte i spesifikamente e deporte di beisbòl ta algu di pueblo. P’esei nan ta sumamente orguyoso di por a kontribuí ku Firebirds i ta deseánan tur klase di éksito.

Ünifòrm Despues ku e patronisadornan a hiba palabra, e ekipo di Firebirds a presentá nan ünifòrm pa kampionato 2018. Kuater hungadó a presentá e ünifòrm kompleto na prensa i demas invitadonan. Tabata un ünifòrm blanku ku e nòmber di e ekipo dilanti i den lomba posishoná riba e number tabata tin e logo di Citizens Insurance komo spònser prinsipal. Señora Jacqueline di un forma ofisial a hasi entrega di e ünifòrm na e Manager Sr Josephina.

Señor Stuart a terminá e anochi gradisiendo un biaha mas nan patrosinadornan ofisial: Citizens Insurance, Curoil, ACU, Cursoft i Brakkeput Mei Mei i a invitá tur hende pa tei presente djamars próksimo 24 di Aprel na stadion di Rif pa presensiá nan promé partido kontra di e ekipo di Sta Maria Pirates. El a menshoná ku lo bai ta un bon ekspektakulo mirando ku nan lo sali tèst nan ekipo kontra di un dje ekiponan ku a hunga final aña pasá.