FCF ta faha ku FC Brabranis ku ta tèrminá 1-1

Un sala Niels Liberia yena ku bon fanátiko a mira kon FCF i FC Brabranis  a split punto na momentu ku e wega a kaba den un empate. FCF a sali pika dilanti notando un bunita gol den e promé mitar. Un tiru feros ku e portero di FCF no a logra nan tapa kompletu a bin resultá riba pia di atakante kontrali ku a skore fasil den di dos mitar pa empatá e wega. Un wega riba hopi spit, bon bringa i ku a konosé momentu ku a hiba públiko na rant di nan asiento. Ámbos ekipo a krea oportunidat pa mas ku un gol. E nèt sinembargo no a bòl i e partido a kaba ku skore 1-1.

Tabata e hungadó eksperensia Jeandrick Felida ku a sa di hasi su mes liber den e promé mitar di wega, pa risibí un paso i bira peligroso riba e arko kontrali. E no a desperdisia e oportunidat i a sa di manda FCF ariba ku skore di 1-0.   Brabranis ku a kai atras den e wega mester a hasi esfuerso pa bini bek. E oportunidat a presentá na momentu ku un hungadó di Brabranis a sali den un kontra atake riba e arko kontrali. E la sa di kita dos kontrinkante for di riba su kurpa i a mira un apertura chikí pa tira riba e arko. Na otro banda di fèlt, Alzinho Costino a baha sam sam den e atake ku su kompañero. Esaki a los e tiru. E kiper a sa di tapa bon riba e tiru, ku a racha den su man i bin kai nèt riba e pia di Alzinho. Esaki no a basilá i a skùif e bala, bòl e nèt pa e wega empatá. Tantu FCF komo Brabranis a sigui preshoná buskando e gol di desempate. Esaki sinembargo no s bin kai. Bon akshon di defensa di ámbos ekipo a stroba esaki. Ku e skore empatá na 1-1 e rèfri a bin flùit e pitaso final.

Relato: Anthony Guillermo