Connect with us

mas deporte

Jean Mark Welvaart buskando titulo mundial den kampeonato mundial di domino na Repúblika Dominikana

E yu di Kòrsou Jean Mark Welvaart ta buskando pa logra otro titulo den kampeonato mundial di domino na Repúblika Dominikana. Imposibel? E tabata rankea number 5 di mundu i a titulá sup kampeon den mundial di domino na Rusia algun aña pasa. Den un kampeonato kaminda riba 1000 hungadó di domino a partisipá. E t’e úniko atleta di e delegashon Kurasoleño ku a konkista medaya n’e weganan Centro Americana del Caribe ku a ser selebrá na Baranquilla, Colombia den luna di yüli. E la bini kas bek ku plata. Un titulo p’e kurasoleño, no ta imposibel.

 

E selekshon di domino di Kòrsou ku ta aktualmente na Repúblika Dominikana kaminda pa partisipá den e kampeonato mundial di domino, mester kompetí kontra di mas di 800 atleta prosedente di 22 pais. E disputa deportivo lo ta pa un premio di 40 mil dòler. E kampeonato ku a kuminsá 23 di òktober den e Hotel Crown Plasa den e  kapital di Santo Domingo. E lo tèrminá 27 di òktober.

 

E deporte di Dominó ta bon organisá na Kòrsou den su bònt for di 1965. Nos domino ta úniko. E manera kon nos ta hunga domino, ku e sistema di libra ku 5 punto, ta ser hunga solamente serka nos aki na Kòrsou, Jamaica i Bonaire. E ta hasi nos úniko. Domino ta un deporte internashonal ku ta ser práktika rònt mundu. Kòrsou tin su istoria ku domino. Den pasado nos a partisipá ku éksito den kampeonatonan inter insular, i den region latino. Jean-Mark ta kompartí detaye di e deporte ku nos. “Tin algun diferensha klave entre e manera e reglanan ku ta dikta e sistema di e deporte domino i e domino krioyo di nos. Den e  deporte ta apliká otro regla pa determiná ken ta sali. Tin libertat pa skohe ku kua pieda ta sali. E diferensha mas kardinal ta ku e deporte no konosé e sistema di libra, manera e domino krioyo konosé serka nos. E kontamentu di punto tambe ta kana fundamentalmente otro. Ta konta wowo ku sobra den man di kontrinkante, ora ku wega kaba. E intenshon ta pa hunga di tal manera ku si bo gana, bo kontrinkante tin mas wowo ku ta posibel den su man, i si bo pèrdè, bo tin mas ménos wowo ku ta posibel den bo man. Tur e “puntonan” ta bai p’e ganadó. Esun ku yega 200 punto promé ta gana”.

Na 2017 ofisina di turismo di Kòrsou tabata spònser prinsipal ora ku e bònt di domino di Kòrsou a organisá aki na Kòrsou e mundial di domino di 2017.  Kòrsou a risibí riba 1000 atleta di rònt mundu, ku a biaha huntu ku nan famia i fanatikada for di mas di 40 pais, pa kompetí ku otro riba suela kurasoleño buskando e titulo kampeon den domino.

Relato: Anthony Guillermo

Click to comment

Leave a Reply

avatar
  Subscribe  
Notify of