Connect with us

Futbol

Links links e ta

WDBSPORT
Esaki ta un posibel aliniashon ku sr Remko Bicentini por sali kune e prome wega.
 
Wega di bala E Falki Deportivo i Carl Ruiter tin e sigiente análisis di nos hungadornan.


Aki nos ta haña nos selekshon hungando den un 4-3-2-1.
Den gol nos ta haña e kara konosi di Eloy Room.
 
Den defensa nos ta haña na “rechtsback” Cuco Martina kapitan di nos selekshon.
Na “linksback” nos ta haña un kara sopresivo Michaël Maria ku den pasado lo nos a mira okupa posishon di mediokampista, pero mirando ku nos tin un bashi na e posishon i tambe ku Maria ta hungado ku mas frekuensia na e posishon ei lo ta un bon opshon pa uza Maria na e posishon aki.
 
Den defensa sentral nos ta haña e duo di Darryl Lachman i Suently Alberto. Darryl Lachman ta un di e pilar nan den nos defensa ku ta bini bek despues ku e la perde nos ultimo wega amistoso kontra Qatar.
Suently Alberto tei bek despues di a debuta pa nos kontra Qatar un defensa sentral ábil ku e bala, fuerte i bon den antisipa hungada tur ingrediente di un defensa sentral moderno.
 
Pa resumi ku e 4 nan aki nos lo tin un defensa ku den sentral forsa i hopi abilidat defensivo i tekniko. Riba e banda nan nos lo haña ku 2 back ku lo por kontribuí na e wega ofensivo di nos selekshon.
 
Den medio kampo nos ta kuminsa ku un kara nobo den forma di un di e pia di ohochi nan Shermaine Martina. Mirando e bashi ku nos tin den bolante defensivo nos lo por konta ku Shermaine ku ta un hungado hoben di 21 aña pero ku lo por ta di bon uzo den e posishon di “6”.
Nos ta move pa Leandro Bacuna ku lo ta pareha di Shermaine pero lo por tin libertad di akopla su mes den atake manera nos a kustumbra kaba i lo por drenta den area penal ku regularidat pa anotá gol.
 
Moviendo mas dilanti den e posishon di “10” nos lo haña Brandley Kuwas Un kara ku pueblo tabata pidi pe despues ku den e wega amistoso kontra El Salvador e la laga nos mira e kalidat i teknika ku e tin ora e la duna e pase di gol despues di tremendo hungada individual.
Riba e banda nan nos lo haña na parti robes Jarchinio Antonia, un hungador gusta aki na Korsou pa su velosidat.
Un arma peligroso ku por hasi uzo di dje sigur den kontragolpi.
Riba banda drechi nos ta haña Gevaro Nepomuceno. Un abil atakante ku ta posee di hopi bon teknika ku kada biaha ta un di esnan mas peligroso den nos selekshon.
E homber di area lo ta nada mas i nada menos Charlison Benschop, e prome yu di Kòrsou pa hinka gol den Bundesliga. Charlison ta un “9” ku tin varios bon arma: e por hunga ku lomba pa gol pa asina sirbi komo un “pivot” pa su mediokampista nan ku ta subi, e ta bon den kabes, e ta fuerte, e tin bon tiru i mas importante e tin nanishi pa GOL.
 
Pa resumi nos mediokampo i atake lo ta dinamiko ku un bon fundeshi den bolante mei mei konsistiendo di Shermaine i Bacuna. I dilanti nan e Antonia, Kuwas i Nepomuceno ku entre nan mes por kambia di posishon durante wega ku lo hasi difisil kontraresta esaki. I den punta e homber gol den forma di Charlison Benschop.
 
E selekshon asina aki lo ta no menos 5 pia links den forma di Michael Maria, Suently Alberto,Shermaine Martina, Brandley Kuwas i Gevaro Nepomuceno. Nos lo tin hubentut den forma di Maria, Alberto i S.Martina kaminda Maria tin 23 i Alberto i S.Martina tin 21.
 
Kiko abo ta pensa di e selekshon aki? Skuchele aki ratu den Deporte Hoyer
 
Keda pendiente pa mas posibel alineashon di nos selekshon.
 
 
#wdb #wegadibala #wdbsport #curacao #futbol #falkideportivo #carlruiter
****************************************
Click to comment
Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x