Connect with us

Volleybal

Stazje na Kòrsou i hunga vòlibòl den Stakamahakchi

E sala Errol Rooi ta karga ku fanátiko ku ta presensia e wega di vòlibòl. E no ta muchu altu. Kisas e por se konsiderá te asta un poko kòrtiku ku su estatura di 1.68 m. Vòlibòlista por lo general tòg ta poko mas altu. Su 58 kilo ta hasi ku e por subi tòg basta fasil riba e nèt. E ta move basta agil den esnan mas haltu rondó di dje. Su estilo di wega ta agrabel pa wak. Pero no ta su estatura ni su estilo di wega ta hala atenshon di públiko. E ta un hulandes europeo. Bo ta mira su desendensia mesora riba fèlt.  E ta literalmente un ‘vreemde eend in het bijt’. Pero unabes  e wega kuminsá i e duna aktivamente su aporte den e desaroyo di e wega, bo ta lubidá e detay’é e ta bira simplemente un hungadó di Stakamachi riba fèlt.

 

No ta Yanissa Gijsbertse a skohe Korsou komo destinashon. Defakto su intenshon nunka tabata p’e bin Korsou. Ta Korsou mes a skohe. Kosnan a kana otro i e la bin resultá den un stazje na Kòrsou. na edat di 16 aña e tabata den e selekshon di vòli di e region di e munisipio den kua e ta biba na Hulanda. E eskoho di su entrenadó di selekshon pa bai kore un stazje na Aruba a impreshoná e hóben Yanissa. Di tal manera ku e la tuma dos desishon importante n’e momentu ei. E la disidí ku e l ke studia pa dosente di edukashon físiko. I e la disidí ku igual na su entrenadó e lo a biaha pa aruba pa kore stazje. Na edat di .. Yanissa a sigui pa kuminsá ku’é estudio di dosente di edukashon físiko. Ora di regla asuntu di e stazje obligatorio e la ekspresá su deseo pa hasi esaki na Aruba. A bin resultá ku na Kòrsou tabata tin mas nesesidat di dosente di edukashon físiko. Esei a buta ku e la desviá di su intenshon anterior pa bai Aruba. Riba 5 di febrüari e la biaha pa Kòrsou. 16 di yüni e lo regresá Hulanda bek. Karga ku eksperensia di un estadia riba un isla ku a pon’é topa su mes na algun okashon.

 

Yanissa Gijsbertse a nanse na 1994 na e munisipio Ede na Hulanda. E tin 22 aña. E la krese na Barneveld. E ta alumno di ‘Hogeschool Windesheim na Zwolle’. Ei e ta den e último fase di su estudio ‘Leraar Lichamelijke Opvoeding’. Anteriormente e la kaba Havo na ‘Johannes Fontanus College’ na Barneveld. E ta koriendo su stazje na skol di fundeshi  Dr. Albert Schweitzer na Willemstad, Korsou. Su stazje ta den kuadro di su delaster fase di su estudio. Su stazje ta sosodé tambe komo parti di ‘Sport, Therapy for Empowerment’. Un èkstra materia ku e ta hasi.

 

“Mi tin ya kaba 16 aña aktivo den vòlibòl. Total 16 aña. Promé komo hungadó i awor komo entrenadó. Di mi 5 te ku mi 12 aña mi a praktiká turnen. Mi a kuminsá ku vòlibòl ora mi a hasi 6 aña.  Ora mi a kuminsá  ku skol avansá e kombinashon di vòlibòl, turnen ku skol a bira muchu pisa. Mi mester a skohe”. Su eskoho a bai pa vòlibòl. “For di edat yòn mi tabata haña e aspekto i traha den tim hopi importante. Mi a kuminsá den kategoria mini. Di einan mi a sigui pasa den ‘jeugd’ i finalmente mi a yega e kategoria di Dames 1e klasse na Hulanda. E aña aki mi a korona kampeon Hulandes ku mi ekipo den nos kategoria. Esei ta buta ku den e aña ku ta bini nos lo hunga den e klase ‘Promoshon/degradashon’. No ta nos promé biaha ku nos ta alkanse e klase di promoshon degradashon. Algun aña pasa tambe nos a logr’é. Nos no a logra na manifestá nos mes den e klase i keda ariba. Nos a degradá bek. Mi tin algun memoria inolvidabel ku vòlibòl. Den nan den na e 3 aña ku mi a pèrtenesé n’e selekshon di region. Den selekshon bo ta train struktural 3 ora mas tantu pa siman. Esaki ta buta mi talento a desaroyá mas lihé. Mi abilidat riba fèlt a bira mas skèrpi.. Awor aki mi ta enbolbí ku selekshon for di un otro ángulo. Mi ta enbolbí ku entrenamentu di e talentonan den nos region”.

 

“Ámbos mayor a indusi den nos e sentido deportivo i e smak pa deporte. Pero ta mi mama ta esun ku a hunga e papel determinante den mi eskoho pa vòlibòl. For di edat hopi chikí nos tabata bai e klup di bala na kua mi tata i ruman hòmber ta pèrtenesé. Nos tabata bai komo famia pa sea yuda of wak nan hunga bala. Ora sali klup di bala ta sigui pa klup di vòlibòl na kua mi mama tabata pèrtenesé. E ala maskulino di nos klup di vòlibòl ta hunga ‘Ere Divisie’. Semper nos tabata bai wak nan weganan tambe. Despues  mi tabata keda hunga vòli ku mi amiganan. E vòlibòl a buta ku nos a bon forma un amistat basta fuerte ku otro. Te ainda mi tin kontakto ku e amistatnan di e temporada ei”.

 

“Por lo general mi ta haña práktika  deporte na Kòrsou físikamente hopi pisa. E temperatura ta saka tur energia for di bo. E kompetensia tambe ta kana hopi otro aki kompará ku Hulanda. E tin su bentaha. Na Hulanda bo mester tèrminá number den bo pul pa sigui pa play off. Aki nos ta yega final ainda, ni maske nos a sali number 2 den pul. Mi ta haña si ku na Kòrsou mester mehorá den konosementu di regla. No ta tur referí ta mes skerpi i mesun konsekuente den nan manera di flùit wega. Kisas nan mester sigui un kurso kaminda nan lo por yega na palabrashon riba e método di flùit wega. Tin algun diferensha riba su mes tambe den e reglanan kompará ku Hulanda. Na Hulanda a adaptá e reglanan na tur lokual ku internashonal a ser palabra. Na Kòrsou esaki no a  sosodé tur kaminda ainda”.

 

Mi ta fuerte den defensa i den pase di bala. Na Hulanda mi ta pèrtenesé n’e ‘de volleybalvereniging SSS Barneveld ‘. Pa nan mi ta hunga e posishon di ‘libero’. Den e posishon ei mi mester sòru pa niun bala kai. Mi ta move basta pisa bai bin den e defensa parti patras. Na Korsou mi ta hunga pa Stakamachi. Mi stazje begeleider a hunga vòli serka Stakamachi. Ora mi a bisé ku mi ke hunga vòlibòl kompetivo, outomátikamente e la hibami Stakamachi. E klup i e hungadónan a risibími man habri. Den Stakamachi tambe mi ta move den e posishon di libero. Mi mester siña konosé mi koleganan den ekipo poko mas ainda. Na Hulanda e posishon ta poko mas fasil pa mi. Mi konosé mi koleganan poko mas mihó i sa presis ken ta alkansá kua bala na kua momentu si of no. E ta fasilitá mi trabou”.

 

“Por lo general mi ta gusta Korsou. Mi famia a reakshoná hopi positivo ora mi a bisa ku mi ke bin kore stazje na Korsou. Di un banda nan a haña un bon motibu opa nan tambe bin i konosé e isla. Di otro banda simplemente nan tabata haña ku un chèns asina aki lo a dunami un eksperensia asina bunita i kua siña tantu balor p’ami, ku nan mester a para mi tras den mi deseo.

E hendenan ta hopi amabel. Aki tin ménos stress. Esei ta algu ku mi ta gusta hopi mes. Semper hendenan tin un smail riba nan kara. E aspekto ei ta stimulámi positivamente. E úniko kos ku mi ta haña ku realmente mester bai mas mihó t’e komportashon di e hendenan den tráfiko. Mi tas inti falta di por usa un baiskel o simplemente bai un kaminda ku bus. E asuntu di mester bai ku outo tur kaminda ta kansami un poko.

 

“Si mi reflehá bek riba mi tempu na Korsou tin algun kos ku tòg mi ke apuntá. Por lo general mi ta haña e isla tin hopi talento deportivo. Wak kon nan ta presta den pro ehèmpel beisbòl. Mi a mira hopi talento tambe den atletismo, basket i futbòl. Naturalmente e nivel di vòli na Hulanda of di basket na Merka ta mas haltu. Pero e ta keda remarkabel e kantidat di talento ku mi a topa riba e isla. Mi no a ferwagt esei. Lo mester tin mas fondo disponibel pa por desaroyá e talento di e hóbennan. Deporte ta importante pe desaroyo, pero mester sòru si pa tin material adekuá disponibel. Poko sala mas na nivel i poko mas mihó ekipá. Mi ta ègt spera pa Korsou ku e deporte lo bira un prioridat p’e gobièrnu. Mi at spera di por regresá aki un par di aña bek na Kòrsou i mira ku kosnan realmente a mehorá. E ambiente ta parti di e dulsura di Kòrsou. Ami lo no lubidá Kòrsou nunka. Bo no sa nunka, kisas mi bin bek pa biba pa semper aki. No ta wak”

Relato: Anthony Guillermo
Potretnan: Media Man Productions

Click to comment
Subscribe
Notify of
guest
0 Comments
Inline Feedbacks
View all comments
0
Would love your thoughts, please comment.x
()
x